O médico brasileiro que desaparecera mentres facía o Camiño de Santiago pola provincia de León apareceu en Lugo e permanece ingresado en observación no Hospital lucense Lucus Augusti.
Así llo confirmou o propio centro hospitalario a Europa Press, que apuntou que Leonardo José Nissola está a ser examinado en Observación do departamento de Urxencias do HULA.
‘SOS Desaparecidos’ lanzara unha alerta do facultativo, que se estaba facendo o Camiño de Santiago e a quen lle perderan o rastro na localidade leonesa de Villafranca del Bierzo.
