O Banco de Alimentos de Lugo cuestiona a súa capacidade de supervivencia ante a alza dos custos de combustible ou luz, tras abonar unha factura de electricidade seis veces máis alta que o habitual, de 1.270 euros.
A presidenta do Banco de Alimentos, Amadora Núñez, sinalou que a entidade pagaba habitualmente entre 240 e 190 euros, cun máximo de 245 euros pola electricidade, mentres que no mes de agosto tivo que abonar unha factura de 1.270.
“Un Banco de Alimentos non se pode permitir pagar iso de luz, porque non hai recursos para todo iso. Ademais, se falamos do combustible e o aluguer da nave, é unha tolemia o que pagamos. Non se entende”, protestou Núñez.
Paralelamente, a presidenta recoñeceu que as “reservas” se atopan, neste momento, “un pouco frouxas”. “Non estamos boiantes e agora só imos tirando”, dixo. Sobre todo, debullou que o que máis falta fai é “arroz, pasta e lentellas”. “Iso é algo que sae todos os días. É moitísima xente a que vén e iso voa”, explicou.
Amadora Núñez constatou que o número de familias que teñen que recorrer ao banco “cada martes e cada venres”, que son os días en que se abre, aumentan, e son ao redor de 2.000. “Polo momento puidemos atender a todo o mundo. Espero seguir adiante como ata agora, coas axudas da xente, coa boa vontade de todo o mundo esperemos poder seguir atendendo”, invocou.
