A alcaldesa de Lugo, Lara Méndez, augurou un San Froilán “moi masivo”, as festas patronais da cidade que arrincan este martes co pregón da comunicadora Esther Eirós e que conclúen o 12 de outubro. Ao tempo, o Concello decidiu reforzar e ampliar as liñas de autobuses.
Méndez lembrou o impacto que tivo esta fin de semana, coa apertura das barracas e cos distintos eventos previos ás festas, co que as expectativas “son moi altas”. “A climatoloxía tamén parece que vai acompañar e iso sempre axuda para que a xente se anime a saír de casa”, destacou.
Tras recuperarse a “normalidade”, logo de dous anos marcados pola pandemia, a rexedora lucense atreveuse a vaticinar que a edición deste ano vai “ser moi masiva, con moita afluencia de xente”.
AUTOBUSES
Pola súa banda, o tenente de alcaldesa, Rubén Arroxo, anunciou que para este San Froilán igual que se fixo noutras edicións, vai haber unha serie de liñas de buses urbanos ata as tres da mañá, nas vésperas de festivos e días non laborables.
En concreto será o día 4, o venres pola noite, o sábado pola noite e na véspera do 12. “Son liñas que van conectar diversos barrios da cidade co centro, co que queremos animar a xente de Lugo a que durante estas festas de San Froilán, se consomen alcol, non toquen o coche”, recomendou.
“FESTAS SEGURAS”
Arroxo reivindicou unhas “festas seguras e que se aposte polo transporte público“. Para estes días habilitaranse “seis liñas e vai haber dúas das que cobren o eixo norte sur e logo outras catro que comunican os barrios, con menos frecuencias que durante o día”.
Precisamente, a frecuencia de norte sur, da cidade de Lugo, vai ser cada 40 minutos e a dos barrios será dunha hora.
