O presidente da Deputación de Lugo, José Tomei, considera que o Partido Popular de Lugo “busca a foto” coa súa oferta ao goberno provincial do PSOE a participar na elaboración dos orzamentos do próximo ano.

“Se o PP fose en serio, presentaría un proxecto de orzamento propio ou propostas concretas, algo que nunca fixo”, sinalou o mandatario provincial e alcalde de Monforte, que remitiu un escrito ao portavoz do PP, Jorge Castiñeira, no que convida aos populares a elaborar a súa propia proposta orzamentaria.

“O portavoz do Partido Popular está a buscar a foto, pero a verdade é que de traballo pola provincia, cero”, engade Tomei, que insta a Castiñeira a “traballar e tentar facer algo produtivo pola provincia, máis aló dos pousados que o único que perseguen é buscar uns ocos nos medios”.

Por outra banda, a Deputación de Lugo informou da captación de 1 millón de euros de fondos europeos para investir nos 29 concellos da provincia que integran as Reservas da Biosfera Terras do Miño e Os Ancares Lucenses e Montes de Cervantes, Navia e Becerreá.

Con estes fondos, o organismo provicial financiará 27 medidas “para impulsar o desenvolvemento social e económico sustentable destes territorios”.