A fonte da Praza do Campo, en plena zona vella da cidade de Lugo, volverá manar viño este venres, 29 de xullo, a partir das 20,30 horas.

Tras dous anos de parón pola pandemia, regresa o que se bautizou como o Milagre de San Vicente, polo que da fonte fluirá viño, nunha actividade programada pola asociación Lugo Monumental en colaboración co Concello de Lugo.

O presidente de Lugo Monumental, Luís Latorre, sinalou que “o día de Santa Marta, o 29 de xullo, a fonte da Praza do Campo manará viño no canto de auga, no coñecido como Milagre de San Vicente”.

Trátase dunha “tradición que se recuperou hai dez anos e que se vén celebrando, desde entón ininterrompidamente, salvo os dous anos de pandemia”. “Esperamos que acuda moita xente”, desexou.

Finalmente, serán 300 litros de viño os que se repartirán ese día de “forma gratuíta”. Esta comezará co “chateo” no que o Concello de Lugo tamén se implicou e haberá música.

O venres, igualmente, farase entrega dos premios de Lugo Monumental que este ano quixo recoñecer a “dona Amparo da Confeitaría Conde”, que falecía hai un par de meses, polo que se entregará o premio a título póstumo á familia.

Tamén se premia á Sucursal, que “é un comercio significativo de Lugo”, e nomearase socio de honra de Lugo Monumental ao dono, tamén falecido, do bar Tosar no centro da cidade amurallada.