Gran parte das provincias de Lugo e Ourense, así como o sur de Pontevedra e zonas de interior da Coruña atópanse en risco de incendio extremo este venres.
Así figura no Índice de risco diario de incendio forestal (IRDI), que elabora a Consellería de Medio Rural. Téñense en conta a análise de diversos factores que inflúen no comportamento do lume, tales como condicións de seca, humidade, temperatura e vento.
Con todo as zonas costeiras da Coruña, a metade norte de Pontevedra e A Mariña lucense están en risco moderado de lumes forestais nesta xornada.
Galicia atravesa os efectos dunha onda de calor que obrigou a decretar a alerta vermella en Ourense nos últimos días. O país, canda oito comunidades autónomas, estará este venres en aviso laranxa por risco importante por altas temperaturas.
