O alcalde do municipio lucense de Castroverde, José María Arias, non ten outra explicación sobre o acontecido no cemiterio de Soutomerille: “Parece cousa de nenos“. E é que este martes pola mañá apareceron profanadas catro tombas neste camposanto, polo que atravesa o Camiño Primitivo a Santiago, e outras seis presentan danos.

É a Garda Civil a que abriu unha investigación sobre este acto que o alcalde nin se atreve a cualificar como vandálico, senón que se limita a soltar que “non” ten “nin idea” de quen podería estar detrás do ataque. “Está a Garda Civil investigando. Isto non vén a nada, non ten sentido o esnaquizar por esnaquizar. É esnaquizar algo que non ten maior sentido”, lamentou.

Catro tombas profanadas e outas seis danadas é o balance deste ataque “sen sentido” e que supón “toda unha desfeita”, ao modo de ver de Arias. “Todo isto non ten sentido ningún. Parece máis cousa de nenos que non saben o que fan, que outra cousa”, clamou finalmente o alcalde de Castroverde, que segue sen dar “crédito” ao acontecido no cemiterio de Soutomerille. Os estragos producíronse en nichos de familiares de distintas familias do concello de Castroverde alí inhumados.