A asociación cultural e observatorio político Lugo Sempre rexístrase como marca política, baixo o nome de Lugo Existe, co obxectivo de presentarse ás eleccións municipais do próximo ano.

O presidente de Lugo Sempre, Agustín Gallego, explicou que “Lugo Sempre sempre será unha asociación cultural e observatorio político“. “Pero si que é certo que xente da asociación rexistramos a marca Lugo Existe”, abundou. “Está a consultarse tanto á afiliación como á poboación e queremos ver cal é o avance para un futuro proxecto político e cales son as vimbias que poden saír de aí para realmente dar o paso de presentarnos a unhas eleccións”, comentou.

Galego resumiu que a “ideoloxía” da nova marca é “a sensatez, o sentido común, que os proxectos saian adiante e que deixe de haber pelexas estériles que non son boas para a cidade de Lugo”. Nun principio as intencións é presentarse na cidade das murallas, aínda que deixan a porta aberta a estenderse por outros concellos da provincia de Lugo. “Neste caso serve para a cidade de Lugo, poida que nalgún outro concello tamén salga algunha cousa. Imos ver que decisión toman os compañeiros”, esgrimiu.

Agustín Gallego, finalmente, sinalou que con Lugo Existe ten que “prevalecer o que sexa bo para a cidade”. “E a ver se somos capaces de darlle saída a problemas enquistados en Lugo, como é a intermodal (para a chegada do AVE) e o auditorio de Magoi”, sinalou para lembrar que aínda non se estreou desde que o rematase a Xunta en 2016.