Axentes da Policía Local de Lugo interceptaron a un menor de 17 anos cando conducía un vehículo sen iluminación, que abandonou de maneira precipitada nun escampado antes de ser identificado.

Así o informou a Policía Local, que relatou que sobre as 00,15 horas do 13 de marzo unha patrulla do Grupo Operativo Nocturno detectou a circulación dun vehículo pola Avenida da Coruña, á altura da rúa Paulo Fabio Máximo, “sen ningún tipo de iluminación“.

Ao darse conta da presenza do vehículo policial, o condutor realizou un xiro cara a unha vía que leva a un escampado, onde estacionou o vehículo e baixouse “de forma precipitada”, indican as mesmas fontes, momento no que foi interceptado polos axentes que procederon á súa identificación.

Ao constatar que se trataba dun mozo de 17 anos que, subliña a Policía Local, “carece de calquera autorización administrativa para conducir vehículo, foi trasladado ao seu domicilio para pór os feitos en coñecemento dos seus pais. Posteriormente, os axentes trasladaron os feitos á Unidade de Atestados do corpo municipal para a instrución de dilixencias por un delito contra a seguridade viaria.