O programa de Acompañamento á inserción laboral da mocidade ‘Reiníciate: enfoca o teu futuro’, promovido pola Deputación de Lugo e a Escola da Organización Industrial (EOI) arrincou e os mozos de entre 16 e 30 anos en paro e inscritos no Sistema de Garantía Xuvenil poderán formarse, sen ningún custo, en materias relacionadas coa dixitalización.
O obxectivo, apunta o presidente do goberno provincial, José Tomé, é “que un total de 400 mozos da provincia poidan acceder a profesións de alta demanda vinculadas coas novas tecnoloxías”. Os participantes recibirán formación en mercadotecnia dixital, redes sociais e en tarefas de auxiliar de xestión informática, xa hai cen inscritos e as formacións arrincarán a próxima semana.
Este programa, que se prolongará durante un ano, impartirase de maneira semipresencial “para facilitar que o alumnado poida recibir formación desde calquera punto da provincia”, apunta Tomé. A Deputación de Lugo e a EOI confían en que despois destas formacións “a inserción laboral chegue ao 25% dos beneficiarios e que como mínimo un centenar de mozos consigan traballo ao acabar o programa”.
Este plan de emprego, que conta cun orzamento de 1.082.950 de euros, dos cales un 85,9% foi achegado pola EOI e o 14% restante pola Deputación de Lugo, garantirá prácticas remuneradas en empresas relacionadas coas formacións.
Esta é unha continuación do plan ‘Reiníciate: dixitaliza a túa empresa’, posto en marcha o ano pasado. Tras o “éxito”, o goberno provincial confía en seguir apoiando este tipo de accións que dan” as ferramentas necesarias” para que os mozos atopen traballo “e sen ter que abandonar os seus concellos”.
