A Policía Local de Lugo tramitou dúas novas denuncias a locais de lecer nocturno da capital luguesa por incumprir a normativa establecida pola pandemia ao non pedir o certificado Covid aos clientes e non contar con persoal que controlase o acceso ao establecemento.
Segundo informou a Policía Local, estas actuacións enmárcanse nos dispositivos de control do cumprimento da normativa Covid durante a pasada noite do 10 de xaneiro, na que efectivos do Grupo Nocturno de Lugo realizaron varias inspeccións en locais de lecer nocturno e tramitaron actas de denuncia en dous establecementos do centro histórico e de Mariña Española.
Por un parte, realizaron acta denuncia por infracción á Lei de Espectáculos e Actividades Recreativas de Galicia “por non dispor estes locais de persoal habilitado para as funcións de control de acceso”. Ademais, tramitaron acta denuncia por infracción á Lei de Saúde de Galicia por non pedir certificado Covid aos clientes que acceden ao interior do establecemento.
