O presidente da Federación Veciñal de Lugo e presidente da plataforma “Lugo… non perdas ou tren”, Jesús Vázquez, anunciou que traballarán por crear unha “fronte común” para evitar que a provincia luguesa se descolgue ” aínda máis” da conexión por ferrocarril.

En declaracións aos medios este venres, Vázquez manifestou que, mesmo, estarían dispostos a promover accións de protesta similares ás que protagonizaron hai anos para reclamar servizos no HULA e que levou en 2015 a reunir máis de 40.000 persoas na cidade.

O presidente da entidade veciñal apelou á necesidade de que se precisa “a unión de todos”, desde institucións a partidos e organizacións sociais, para configurar unha “gran fronte común” da sociedade luguesa en aras de reclamar os seus dereitos.

“Isto é algo que nos une a todos e xogámonos o futuro ferroviario da provincia. Xa imos convocar desde a plataforma a todos os colectivos para conseguir esa fronte común e dicirlles aos gobernos, do signo que sexan, que Lugo merece servizos ferroviarios dignos e en condicións”, avanzou.

“Hai que ver a situación de abandono, os edificios da propia estación en que situación tan lamentable están. Lugo está a perder o tren, iso é indubidable“, lamentou Vázquez, que lembrou que o problema non é “só” a conexión por liña de alta velocidade, xa que a cidade conta cunha estación “da que apenas saen trens”.