Activistas do Salvador visitan estes días a cidade de Lugo, onde denunciaron a “vulneración dos dereitos humanos” que se producen no país centroamericano, coas mulleres como o principal expoñente desa “violación” de dereitos. Unha delas, da asociación ‘Colectiva Feminista’, Mercy Mulato, comentou que “O Salvador é un dos países onde está penalizado o aborto e se criminaliza ás mulleres con penas de ata 30 anos de cárcere”.
“Neste momento no meu país non se conta cunha lexislación que garanta a lei e a saúde das mulleres. Temos moitos problemas de acceso a anticonceptivos e graves deficiencias por parte do Estado para garantir os dereitos“, relatou.
Ademais, puxo de manifesto que O Salvador “é un dos países onde se exerce moito a violencia sexual en nenos menores de idade, e así o Ministerio de Saúde en 2020 rexistrou 12.902 nenas embarazadas entre idades de dez a 19 anos”, denuncia.
Mercy Mulato subliña que viñeron a Galicia, e a Lugo en concreto, para que “se saiba o que pasa no Salvador” e co fin, basicamente, de “expor a situación que se vive actualmente”.
“Lamentablemente vivimos nun país moi conservador, moi machista, no que as mulleres somos como de segunda man para a sociedade e onde se vulneran constantemente os dereitos das mulleres”, criticou.
Así mesmo, condena que aínda “non se haxa despenalizado o aborto” e que “non haxa un respaldo xurídico para que non se siga encarcerando a máis mulleres”. “A maioría das presas son mulleres pobres, de zonas rurais e sen acceso á educación, nin á sanidade. Hai un ensañamento coas mulleres máis vulnerables do país”, censurou.
Finalmente, esta activista salvadoreña chama a atención sobre a ausencia dunha “lei de identidade de xénero para poboacións de LGTBI”. “Hai un gran retroceso nos dereitos humanos e das mulleres en dereitos sexuais e reprodutivos”, concluíu Mulato, que é tamén a directora do primeiro medio de comunicación feminista en liña no Salvador.
