A Deputación de Lugo prevé abrir nos próximos meses, entre finais deste ano e principios de 2022, dúas residencias de maiores máis nos municipios de Navia de Suarna e Meira.

A máis próxima á súa apertura será a de Meira e, tras ela, a de Navia de Suarna, tal e como destacou este venres, tras a xunta de goberno provincial, a portavoz socialista, Pilar García Porto.

Despois da reunión semanal do goberno provincial, explicouse que se aprobou a “adxudicación de tres do cinco lotes que conforman o contrato para poder dotar de equipamento ao centro de atención a maiores que vai estar aberto en Navia de Suarna”.

Porto concretou que “o que se adxudicou foi por un importe total de 186.000 euros, e son os lotes que se corresponden co mobiliario xeral, cos equipos médicos, cos xogos, co material pedagóxico e tamén coas axudas técnicas, a maiores de pequenos electrodomésticos e material de limpeza”, enumerou.

Con estas dúas residencias, a Deputación chegará ao oito centros de maiores tras o seis que ten agora abertos na actualidade en Ribadeo, Trabada, A Fonsagrada, Pol, Castroverde e Pedrafita.

OUTRAS ACTUACIÓNS

Na mesma xunta de goberno acordouse “a aprobación do contrato para a subministración de medicamentos veterinarios e material sanitario veterinario para a xestión sanitaria da granxa Gayoso Castro”. “E aquí contamos cun importe de 26.800 euros, o prazo é dun ano que se poderá prorrogar con outro máis”, detallou.

“En relación coa granxa, seguimos avanzando en moitos traballos que se realizan na granxa para pór a disposición de todos os gandeiros desta provincia tanto avances tecnolóxicos, como avances en estudos médicos e sanitarios sempre en colaboración coa USC”, resaltou.

Pilar García Porto informou, ademais, de “a resolución de subvencións, en réxime de concorrencia competitiva, que estaban destinadas a asociacións sen ánimo de lucro que se atopan no territorio das Reservas da Biosfera; Terras do Miño e Ancares lucenses, para desenvolver e pór en valor o patrimonio natural, cultural e paisaxístico destes territorios neste ano”.

Coa “nova liña de axudas” consignáronse 83.000 euros, de subvención, a 23 “entidades que traballan nas dúas reservas, e que teñen como obxectivo desenvolver este territorio, facer actuacións e proxectos vinculados ao medio ambiente e ao medio rural, desde o mantemento de rutas de sendeirismo ou iniciativas para a difusión da biodiversidade”, destripaba finalmente a tamén deputada encargada da área de turismo na Deputación de Lugo.