O bosque urbano das Gándaras, que alberga 15.000 exemplares e cultivos enerxéticos, así como 8 bosques autóctonos galegos con 55 especies arbóreas, abrirá por primeira vez as súas portas á cidadanía esta semana. Farao a través dunha programación de visitas guiadas, xornadas de portas abertas e obradoiros infantís.
O executivo municipal puxo en marcha esta nova zona verde no marco do proxecto LIFE
Lugo+Biodinámico. A través desta iniciativa, na que o Concello traballa da man das investigacións da Universidade de Santiago (Campus Terra) e a Universidade Politécnica de Madrid, Lugo “convértese en cidade impulsora do deseño das urbes sostibles do futuro para conseguir barrios e espazos neutros en carbono, ao mesmo tempo que impulsa a economía verde e circular”.
Lara Méndez explicou que “esta será a primeira vez que se abra este espazo ao conxunto dos lucenses, pois ata o de agora a vexetación atopábase en período de implantación e o acceso ás parcelas limitouse ao persoal da Universidade, e agardamos que o próximo verán o acceso sexa totalmente libre e público”.
