A Garda Civil interceptou na provincia de Lugo a un veciño da localidade de Boadilla del Monte cando circulaba cun adhesivo falso de ITV no seu turismo.
Segundo informou o Instituto Armado, imputou en calidade de investigado a un veciño da poboación madrileña de Boadilla del Monte de 47 anos de idade como presunto autor dun delito de falsidade documental.
Os feitos tiveron lugar no transcurso dun control preventivo á altura do quilómetro 18 da estrada N-640 na provincia de Lugo, onde a persoa investigada conducía un turismo “cun distintivo falso de ITV”, destaca a Benemérita.
As mesmas fontes detallan que nese distintivo “lle constaba unha validez ata agosto do presente ano”, pero os axentes verificaron que “realmente ten a ITV desfavorable desde o pasado día 9” deste mes.
Por iso, a persoa investigada en relación con estes feitos foi posta a disposición xudicial.
