A Garda Civil de Lugo remitiu á delegación da Consellería de Medio Rural da Xunta un informe sobre o falecemento “por causas naturais” dunha egua cuxo cadáver apareceu nun lugar de pastoreo, xunto a un poldro, na parroquia de Raiola (Xermade). Pertence a un veciño que fora investigado pola venda de carne de cabalo.
Segundo o relato policial, o 26 de febreiro a Comandancia de Lugo recibiu a chamada dun veciño desa parroquia na que daba conta da presenza do animal morto e dun poldro. Fontes do Instituto Armado puntualizaron que se trasladaron ese mesmo día ao lugar, onde observaron que a egua “non presenta signos de ser atacado por alimañas”, como o lobo.
Por iso, inmediatamente procédese a localizar ao dono dos animais, que nese momento se atopaba fóra de Lugo. Varios días despois, o 1 de marzo, presentouse en dependencias da Benemérita e acreditou que os animais eran seus e que os tiña nun remolque en Vilalba.
Posteriormente, o propietario pediu autorización para enterrar ao animal morto nunha leira da súa propiedade. Dáse a circunstancia de que o dono desta egua fora investigado no ano 2017 polo Seprona da Garda Civil pola venda de carne de cabalo. Neste caso, a Garda Civil non iniciou investigación e tan só se remitiu un informe sobre ese falecemento á delegación de Medio Rural da Xunta.
