O presidente da Asociación Provincial de Empresarios de Hostalaría de Lugo, Cheché Real, avanzou que o sector proporá á Xunta que permita a apertura dos restaurantes ata as once da noite e igualmente amplíe a esa hora o toque de queda.
Real apostou por ir máis aló de pedir o peche da hostalaría “ás oito”, porque no caso dos restaurantes é “como non facer nada e a un restaurante dálle o mesmo pechar ao seis”. “Mesmo podería verse a posibilidade de diferenciar as cafetarías e bares dos restaurantes e poder ampliar nos restaurantes ata asonce da noite e aí habería que mirar tamén o do toque de queda”, suxeriu.
Con esta proposta, Cheché Real xustificou que o que se pretende “é dar maiores facilidades para traballar con certa dignidade”, subliñaba o empresario.
Outro problema que se expón é o dos “aloxamentos” condicionados polos peches perimetrais ou a cuestión da procedencia, porque en Lugo e en toda Galicia acóllese “a moita xente de Madrid que está nuns índices de contaxios tremendos”. “Xa que nos estamos apertando o cinto desde hai meses, se agora abrimos as portas pódese estender o virus. O noso máximo inimigo é a transmisión do virus”, alertou.
