O director do centro penal de Monterroso, Antonio Rivera, confirmou un positivo entre os internos, que permanece illado e que se atopa “totalmente asintomático“.
O interno deu positivo o pasado 4 de xaneiro, tras regresar dun permiso penal, polo que lle “se fai un protocolo específico de illamento e unha vez que terminan o illamento fáiselles unha PCR”. “Este deu positivo e á parte de que estaba a cumprir un protocolo de ingreso para non contaxiar a máis xente, abríronse tamén protocolos específicos“, explicou.
Estima que o contacto “foi no seo da súa familia, os días que permaneceu de permiso”. “No momento que deu positivo hai un illamento sanitario estrito, de cumprimento de todas as medidas preventivas, de uso dos EPI establecidos para o mínimo contacto con el. Estará un mínimo de dez días”, precisou. “Non tivo contactos con máis internos que estaban no módulo e aí non vai entrar, nin saír ningún interno ata que pasen dez días”, agrega. Antonio Rivera constata que os presos dese módulo “deron todos negativo”, e a pesar diso permanece “confinado”.
Finalmente, sobre os funcionarios, o director de Monterroso sinalou que se traballa “con medidas de prevención, e no seguimento dos funcionarios non houbo situacións de risco”.
