EFE | Axentes da Policía Local desaloxaron un local de hostalaría na cidade de Lugo que abriu as súas portas a pesar de que a súa actividade quedara clausurada por un decreto da Alcaldía como consecuencia da “acumulación de infraccións”.
Segundo informou a Policía Local, unha patrulla comprobou onte que un local situado na Rúa Río Avia, sobre o que pesaba unha orde de peche e suspensión de actividade, estaba aberto ao público.
Ademais, a persoa que o rexenta colocara tres carteis no exterior do local para avisar aos potenciais clientes de que o establecemento estaba aberto “todos os días da semana” a partir das 08:30 horas.
Os axentes identificaron o responsable do establecemento e, posteriormente, procederon ao seu desaloxo e peche. Segundo a Policía Local, non se produciu ningún tipo de incidente e o local quedou precintado ata que regularice a súa situación.
