O 30 de novembro do ano 2000 coñeceuse, de madrugada, o recoñecemento da Muralla Romana de Lugo como Patrimonio da Humanidade, tras darse a coñecer o fallo da Unesco. O daquela rexedor local, Xosé López Orozco, festexou o nomeamento, con “foguetes” desde a casa consistorial tras anos de traballo para promover a candidatura deste ben histórico. “Estou moi satisfeito, é un recordo indeleble”, di vinte anos despois.
Este luns 30 de novembro conmemórase o XX aniversario da efeméride. Orozco confesa que se sentiu “moi feliz” ante “unha gran ocasión, moi ben aproveitada por Lugo e por todos os lucenses”. “Un recoñecemento de algo que é moi importante para a cidade e para a cultura, que é ademais moi importante para saber quen fomos”.
MUSEO DA ROMANIZACIÓN
O exalcalde de Lugo lembrou, con todo, que “bota de menos” o cumprimento dun “compromiso” por parte da Xunta: o acondicionamento do cuartel de San Fernando como centro da romanización da comunidade, e sobre a Galicia “castrexa”.
Orozco lembrou o “gasto que lle supuxo ao concello comprar o cuartel” e apelou a unha “promesa” trasladada polo presidente da Xunta de Galicia, Alberto Núñez Feijoo, que espera que “cumpra”. “Daríalle á muralla unha maior explicación do que foi o Lugo romano e por que Lugo ten unha muralla”.
Neste sentido suxire trasladar esta reivindicación á rúa “como se fixo no seu día para reclamar” distintos servizos sanitarios para o HULA. “Debemos estar todos unidos para reclamar algo que se nos prometeu e algo que é necesario”, insistiu.
