EFE | O custo da semana de actividades culturais programadas polo goberno local de Lugo para substituír o programa habitual das festas de San Froilán como consecuencia da pandemia orixinou polémica no Concello. A oposición considera este gasto —cifrado en 552.435 euros— como un auténtico “despropósito”.
Na comisión de festas, que se reunía hoxe no Concello de Lugo, a edil de Cultura, Maite Ferreiro, sacaba peito pola xestión do seu equipo e afirmaba que “a estratexia adoptada para non concentrar o público foi un éxito”, pero “levou implícito un aumento dos custos de produción, dado que houbo que habilitar sete recintos para as actuacións musicais e un oitavo para as mostras de artesanía”.
Por iso, houbo que “multiplicar o número de carpas, valar os recintos e garantir os recursos materiais e humanos” para que os lucenses puidesen “acceder a máis de 125 actividades culturais seguras”.
En total, “a semana cultural do San Froilán supuxo un investimento por parte do Concello de 552.435 euros”, dixo Ferreiro, quen agradeceu a “todas as agrupacións, artistas, empresas e ao persoal do Concello a súa implicación para que o San Froilán fose adiante”.
CRÍTICAS DO PP
Con todo, para o Partido Popular, é “un despropósito que o San Froilán custase 100.000 euros máis que o ano pasado”, a pesar de que non se programaron concertos multitudinarios, o recinto feiral estivo pechado e tampouco houbo casetas do polbo.
A edila popular Beatriz Vázquez asegura que o seu grupo non comprende “o desembolso de medio millón de euros nun sucedáneo de festas”, reconvertido “en semana cultural e que carecía de novidades”.
Ademais, criticou tamén a fórmula elixida polo goberno local para contratar a produción e a seguridade das actividades, dado que “se fixeron a través de contratos menores”, cando hai outras fórmulas “máis beneficiosas e máis transparentes”, que “garantirían a participación de todas as empresas e non só as invitadas polo BNG”.
