O viceportavoz do PP no Concello de Lugo, Antonio Ameijide, esixiu explicacións e “responsabilidades” ao goberno local polo bloqueo dunha ambulancia polos traballos de pintado en Fontiñas este fin de semana.
O feito producíase, segundo explicaron os populares, na madrugada do sábado ao domingo, durante o traslado ao HULA dun enfermo crónico e logo que os operarios retivesen o vehículo durante cinco minutos en Fontiñas durante uns traballos de sinalización viaria desa rúa.
Ameijide puntualizou que “si ben é normal que se aproveite o horario nocturno para facer este tipo de traballos, o que é surrealista é que se pare un vehículo de emerxencias para que non estraguen a pintura, sen dar unha alternativa de paso ou sen un previo aviso que preveña estas situacións para buscar outra vía alternativa”.
É por iso que o PP da cidade esixe “explicacións e responsabilidades polo sucedido”, ademais de demandar que “o goberno local ofreza, aos servizos de urxencias e emerxencias, unha información diaria tanto dos repintados como dos cortes de vías por outros motivos”.
“É necesaria unha coordinación exquisita cos servizos de emerxencias para que o tráfico flúa e non se repitan incidentes como o vivido este fin de semana. Creo que todos coincidimos en que debe de haber un protocolo de actuación para que non quede en mans do operario de quenda si pode ou non pode pasar un vehículo“, subliñou.
