A alcaldesa de Lugo, Lara Méndez, cifrou en 18,5 millóns de euros os remanentes que ten o Concello e que podería utilizar despois de que se liberaron por parte do Goberno central.
Méndez explicou nunha comparecencia que “os remanentes non son unha cantidade fixa e estática e menos nun concello como o de Lugo, que ten as contas saneadas e ten débeda cero”. “E temos a capacidade de facer uso dos mesmos”, valorou.
“No que levamos de mandato levamos catro modificacións de crédito, a última por un importe de cinco millóns de euros e a anterior de seis, con medidas tan importantes e necesarias como ese plan Reanima Lugo que axudo a moitas empresas e autónomos a poder ter aberta a porta dos seus negocios”, concretou.
Ademais, a rexedora incidiu en que “non é un dato fixo, porque máis aló desas modificacións de crédito tamén se tirou de remanentes para ter ao día o pago de facturas pendentes, con pagos de ata 18 millóns de euros para pór ao día esas facturas pendentes”. “A cifra que podemos estar a roldar agora mesmo (de remanentes) sería de 18,5 millóns de euros, que queremos utilizalos no que queda de ano para seguir atendendo as necesidades” da cidade, sinalou.
PARQUE MULTIFUNCIONAL
Este dato achegouno nunha rolda de prensa, acompañada polo concelleiro de Medio Ambiente, Álvaro Santos, na que presentaron unha nova actuación, aprobada na Xunta de Goberno, que é un “parque multifuncional” na rúa alcalde Xosé Novo Freire.
En concreto, acordouse a licitación, por un importe superior aos 150.000 euros, nunha zona de actuación que comprende 574 metros cadrados e onde se contemplan xogos para os máis pequenos e tamén espazos “biosaludables” para os maiores.
Segundo apuntaron, os traballos poderían comezar a finais de ano e estar concluídos nun prazo de dous meses e medio, que perseguen “unha maior humanización dos espazos públicos”, concluíu.
