O Concello de Lugo pechou esta fin de semana o albergue que montara no Pavillón Municipal dos Deportes para acoller de maneira provisional as persoas sen teito durante a pandemia.
O goberno local habilitara estas instalacións o 27 de marzo, dado que o Fogar do Transeúnte estaba “desbordado” e facíase moi complicado atender a toda a xente en condicións de seguridade. En total, o pavillón acolleu 77 persoas sen fogar de Lugo, pero tamén doutras cidades como Santiago, Ourense, A Coruña, Bilbao ou Madrid.
Agora, coa mobilidade recuperada, o Concello explica que moitos dos usuarios volverán ao seu lugar de orixe, así que o Fogar do Transeúnte xa poderá dar cobertura aos usuarios habituais.
Así, o persoal do Concello recolleu todo o equipamento instalado no pavillón, xestionado neste tempo por un equipo de Cruz Vermella e voluntarios. Agora agárdase que estas instalacións poidan restablecer o seu uso deportivo.
