A Garda Civil retirou este mércores en Baleira catro lazos colocados para impedir o acceso dos xabaríns ao interior das leiras e así evitar os danos que provocan nas mesmas. Estaban situados nos límites duns prados no monte de Cabreira, parroquia de Cubilledo.
Segundo informou o Instituto Armado, os lazos, de catro milímetros, “atopábanse estratexicamente colocados” nas entradas por onde supostamente acceden os animais salvaxes. Os lugares onde estaban as trampas “foron acondicionados manualmente” e podíase observar que estas levaban sendo usadas “desde hai tempo”, posto que tiñan algunhas partes “oxidadas”.
Por mor da investigación efectuada propúxose para sanción o presunto autor e propietario destes lazos, o cal se enfronta a unha infracción administrativa á Lei de caza de Galicia e á Lei de Patrimonio natural e Biodiversidade que regula os métodos non selectivos para a caza.
