EFE.- Algúns establecementos hoteleiros de Lugo xa mostraron a súa disposición a ofrecer as súas instalacións á Consellería de Sanidade, en caso de que fose necesario facer uso das mesmas para atender a persoas afectadas por coronavirus.
Sanidade contactou coa Asociación Provincial de Empresarios de Hostalería de Lugo (APEHL) para tantear o terreo e saber cantos establecementos se ofrecerían. A APEHL enviou un correo electrónico aos asociados e, en menos de 24 horas, a oferta de prazas xa é suficiente para cubrir a demanda exposta pola Consellería.
Segundo explicou o presidente da APEHL, Cheché Real, trátase dunha medida “de precaución”, por se finalmente se produce “unha escalada de casos positivos do virus” que obrigase ás autoridades sanitarias a buscar máis camas para atender os pacientes.
