A cifra de accidentes de tráfico na provincia de Lugo descendeu no 2019. Tamén diminuíu o número de vítimas mortais en sinistros, ao pasar de 22 mortos no 2018 a 19 durante o pasado ano.
Segundo puntualizou a subdelegada do Goberno en Lugo, Isabel Rodríguez, dezasete das vítimas faleceron en vías interurbanas, mentres que as outras dúas o fixeron en vías urbanas. Houbo, ademais, 73 feridos hospitalizados e 571 que non precisaron hospitalización.
O total de accidentes situouse en “451, cando o ano anterior (2018) se rexistraran 532 accidentes con 22 falecidos, 79 feridos hospitalizados e 697 non hospitalizados”. Ante estes datos, Isabel Rodríguez felicitou a Garda Civil de Tráfico da provincia “porque permitiron reducir as cifras de vítimas”.
NOVAS LOCALIZACIÓNS PARA SACAR O CARNÉ
Estes datos foron destacados durante unha rolda de prensa do Concello de Lugo para presentar as novas localizacións para sacar o carné de conducir na cidade. Estiveron presentes o xefe provincial de Tráfico, Ángel Álvarez, e a alcaldesa da cidade, Lara Méndez.
Ela foi quen precisou que esas novas localizacións se situarán na zona de Garabolos (Avenida Paulo Fabio Máximo) e nas inmediacións da Escola Superior de Arte e Deseño. Méndez xustificou estes cambios “para dar seguridade” nas probas prácticas que se realizan para expedir o carné de conducir. Segundo comentou, o ano pasado máis de 4.000 persoas examináronse do mesmo na cidade.
Pola súa banda, o xefe provincial de Tráfico, Anxo Álvarez, presumiu que coas novas localizacións preténdese igualmente dar “máis dinamismo” e profundar na “adaptación da proba máis a unha circulación real”.
