A Academia Galega do Audiovisual vén de anunciar os proxectos e profesionais finalistas nos XVIII Premios Mestre Mateo. Esta edición terá moito sabor lucense, xa que a serie Hierro, dos irmáns Coira, é a produción que máis candidaturas suma, cun total de 16; e  O que arde, de Oliver Laxe, é finalista en doce categorías.

As candidaturas finais déronse a coñecer esta mañá no Teatro Colón da Coruña, nun acto conducido pola actriz Tamara Canosa e o comunicador Rodrigo Vázquez. Segundo destacan dende a Academia, a primeira rolda de votacións nesta carreira polos premios sitúa esta edición como unha das máis igualadas dos últimos anos. “Da fe da boa saúde da que goza o audiovisual galego”, engaden.

Tamén o lucense! Hierro, O que arde e Quen a ferro mata (15 candidaturas) encabezan a lista das producións con máis presenza nestes Premios. Compiten polos galardóns a Mellor Dirección, Guión, Fotografía, intérpretes protagonistas, Maquillaxe e Perruquería, Dirección de Arte e Dirección de Produción, Montaxe, Son e Vestiario.

Así, Benedicta Sánchez e Amador Arias optarán a cadanseu premio pola súa actuación no filme de Oliver Laxe, rodado nos Ancares. O fonsagradino comparte candidatura con outro lucense, Luís Tosar (protagonista de Quen a ferro mata). 

COIRA X2

A unha certa distancia en número de candidaturas sitúanse a serie A estiba e a longametraxe Eroski Paraíso (Jorge Coira). A adaptación para a pantalla cinematográfica do éxito teatral da compañía Chévere acada 7 candidaturas, mentres que o thriller policial da TVG obtén 6. Destaca a dobre candidatura de Jorge Coira na categoría a Mellor Dirección, neste caso compartida con Xesús Ron.

Por outra banda, na categoría de Mellor Curtametraxe tamén estará presente Homomaquia, do lucense David Fidalgo, que xa optou a un Premio Goya 2020.

As gañadoras daránse a coñecer o vindeiro sábado 7 de marzo no Pazo da Ópera da Coruña, nunha gala presentada por Patricia Vázquez.