Axentes da Unidade Territorial da Policía de Barrio de Lugo rescataron unha ovella que caeu ao Río Miño nas inmediacións do centro da UNED, tras o que quedou atrapada entre unhas ramas.
Segundo informou a Policía Local, a ovella estaba atrapada na auga entre unhas ramas e un dos axentes aproximouse “corpo a terra”, concretan as mesmas fontes, mentres o seu compañeiro o suxeitaba polos talóns. Deste xeito, “lograron coller o animal cun lazo que prepararan” e procederon a rescatala.
A “rápida e eficaz intervención” dos axentes, incidiu a Policía Local, “salvou a vida do animal”, que foi trasladado ao Hospital Veterinario Rof Codina para o seu coidado. A Policía Local de Lugo puntualizou que descoñece a propiedade da ovella porque carece de crotal.
