A presidenta da Plataforma Stop Desafiuzamentos Lugo, Mina Galván, explicou este luns que a asociación traballa actualmente nunha ducia de casos, a maior parte relacionados con falta de pagamentos no aluguer.
Galván asegurou que o ano 2019 foi “peor” nos primeiros meses, pero que foi mellorando co avance das semanas. Actualmente, o foco máis activo é o dos alugueres, dado que “a xente é moi desconfiada á hora de alugar unha vivenda”.
A piques de pechar o ano, a plataforma traballa “en media ducia de casos que están en vías de solución e noutra media ducia nos que a situación é máis complicada”.
Galván sinalou que o caso máis grave en Lugo é o “dunha nai, moi nova con dous nenos, e que por un accidente de tráfico ten problemas para acceder aos bonos de aluguer”.
En canto ás hipotecas, a activista advertiu que “segue habendo problemas, pero xa hai sentenzas e os xuíces actúan de oficio e mandan providencias para que a xente reclame”. “O das hipotecas cos bancos está un pouco mellor, segue habendo problemas graves pero son menos”, concluíu.
