Axentes da Policía Local de Lugo realizaron un dispositivo de inspección entre o venres e o sábado da semana pasada, dentro do cal precintaron varios equipos de música non autorizados en locais da cidade.
O operativo, para o control do cumprimento da normativa de espectáculos públicos e actividades recreativas, desenvolveuse naquelas zonas da cidade onde se sitúan locais que producen “o maior número de queixas por molestias e alteracións de orde pública“, precisou o corpo, en concreto na zona da Tinería, Yáñez Rebolo, Camiño Real e Luís Seoane.
Como resultado, informaron, “precintáronse os equipos de reprodución musical e altofalantes” que estaban a funcionar nalgúns locais que carecían de autorización para iso, “a pesar de que, no seu día, lles fora notificada aos seus titulares a orde de retirada da instalación musical non autorizada”, subliñaron.
