Axentes do Corpo Nacional de Policía practicaron durante as festas patronais de San Froilán un total de cinco detencións, ademais de intervir en zonas de lecer nocturno un total de seis armas brancas, e de reintegrar a un centro de acollida oficial a un menor que fuxira.
A Policía Nacional despregou durante as festas patronais de San Froilán un dispositivo especial de seguridade na cidade de Lugo formado por todos os efectivos da Comisaría Provincial, co reforzo de dúas dotacións da Unidade de Prevención e Reacción da Coruña e Ourense, así como da Brigada Móbil da Xefatura Superior de Policía de Galicia e da Policía Autonómica.
En canto ás cinco detencións, tres arrestos foron realizados no recinto feiral en resposta a reclamacións xudiciais e outros dous por infraccións penais.
Durante as festas, os axentes despregados na cidade tamén levantaron sete actas por posesión ou consumo de drogas na vía pública, ademais de realizar doce intervencións humanitarias, fundamentalmente por caídas ou por consumo excesivo de alcol.
Ademais, grazas á colaboración dos cidadáns, foron identificados dous homes de mediana idade que estaban a causar desfeitas no mobiliario urbano e en zonas verdes do Parque de Rosalía de Castro. EFE
