A portavoz do BNG no municipio lucense de Castroverde, Iria Castro, denunciou que o concello destruíu “deliberadamente” unha fonte inaugurada por un alcalde republicano no ano 1933.

Nun pleno extraordinario celebrado este venres, a portavoz nacionalista preguntou á edila de Cultura, a socialista Pilar Ferreiro, “por que esa fonte non estaba catalogada como ben cultural polo Concello” e “por que se optou pola demolición en lugar dunha rehabilitación da mesma”.

Así mesmo, Castro tamén instou á responsable da área de Cultura a que “especifique o custo dunha actuación que non estaba prevista realizar segundo o libro de actas” e que foi efectuada nun “tempo récord”.

“O luns pola noite decatámonos de que a tiraban e este xoves xa había unha nova fonte instalada”, precisou.

Segundo indicou a política nacionalista, dita construción atópase nunha zona coñecida como Travesía de Montecubeiro, unha rúa paralela á vía principal da capitalidade municipal.

Así mesmo, está moi preto do castelo de Castroverde, unha fortaleza do século XIV que pertenceu a Don Álvaro Pérez Osorio, duque de Aguiar e conde de Villalobos, e mesmo “parece ser que na base de fonte puideron utilizar pedras da muralla do castelo”, indicou Castro.

A portavoz nacionalista insistiu na “importancia de protexer este tipo de construcións para poñer en valor o conxunto histórico-artístico do concello”, motivo polo cal solicitaron “unha pronta resposta” á máxima responsable da área de Cultura no concello castroverdense.