Os nosos maiores tamén teñen dereito a divertirse, a encher o bandullo e a mover as cachas bailando unha peza. Iso pensan en Vilalba, onde o Concello e maila Comisión de Festas de San Ramón e Santa María organizan a Xira da Terceira Idade. Será o vindeiro mércores 21 de agosto na área recreativa da Madalena.

O evento, que conta coa colaboración de Protección Civil, a Policía Local e a Garda Civil, comezará ás 12 da mañá e prolongarase durante toda a xornada. A primeira parada será unha misa campestre cantada pola coral vilalbesa Luar, xusto antes de que o Dúo Eclipse amenice a sesión vermú. Deseguido, os asistentes poderán gozar dun xantar de confraternidade nunha carpa ubicada na praia fluvial da Madalena. Churrasco, paella, xamón cocido… serán algunhas das opcións a degustar. Pola tarde, será tempo de música e baile. Repite o Dúo Eclipse e súmaselle o Grupo Acirema.

Os organizadores da festa lembran que os interesados poden mercar a súa entrada por adiantado na casa da cultura de Vilalba ou ben reservala chamando ao Concello.