Pilar García Porto será a voceira socialista do goberno provincial neste novo mandato. Así o avanzou este mércores o presidente da Deputación de Lugo, José Tomé, que destacou dela a súa “traxectoria e experiencia” tras levar oito anos vinculada ao equipo de goberno.
García Porto entrou na corporación provincial no ano 2011, cando ocupou a área de Economía, Recadación e Facenda, labor que compatibilizou coa de vicevoceira socialista na Deputación. No pasado mandato dirixiu a área de Cultura, Patrimonio Histórico, Artesanía e Deseño, e Educación.
José Tomé fixo fincapé na súa “gran capacidade de diálogo” e “resolución”. “Coñece perfectamente a casa e a súa xestión”, engadiu o presidente. Ademais, dende a Deputación poñen en valor que esta será a primeira vez que unha muller asume o papel de voceira do goberno provincial, algo que segundo eles cumpre co compromiso de avanzar na igualdade de xénero.
SECRETARÍA XERAL
Á parte do nomeamento de García Porto, no día de onte tomou posesión como secretaria xeral da Deputación María Esther Álvarez Martínez. Ela viña desempeñando ese cargo dende novembro de 2018, momento no qeu se converteu na primeira muller en asumir tales funcións.
PLENO DE ORGANIZACIÓN
Por outra banda, tal como avanzara o presidente, hoxe foi convocado o Pleno extraordinario para aprobar a organización da Corporación provincial. Dita sesión celebrarase o vindeiro martes, día 30, ás 11.00 horas. A celeridade para a súa convocatoria responde ao afán para implantar canto antes un “funcionamento ordinario, a normalidade e a tranquilidade” na Deputación.
Lugo, 24 de xullo de 2019
