Un mozo duns 26 anos de idade, identificado como A.M.M., foi detido tras unha persecución policial despois de causar danos nun bar e agredir a clientes deste establecemento en Lugo.

Segundo relatou a Policía Local, axentes da Unidade Territorial da Policía de Barrio de Lugo detiveron ás 18,00 horas do pasado 6 de xuño a este mozo, A.M.M., de 26 anos e veciño da cidade.

Cando patrullaban polas inmediacións dun bar situado na Avenida da Coruña foron requiridos por varias persoas xa que no seu interior o mozo estaba a causar danos ao tirar “cadeiras e taburetes contra o mobiliario do bar”, destacaron as mesmas fontes, e “agredindo”, engadiron, aos clientes que había.

Posteriormente saíu correndo do local e os axentes mobilizados localizárono á altura do número 198 da Avenida A Coruña onde, tras darlle varias veces o alto, fixo caso omiso e introduciuse no interior dun edificio.

Tras entrar ao segundo piso, propiedade dun tío seu, saltou pola xanela cara a unha terraza cuberta e, posteriormente, saltou de novo un peche perimetral duns dous metros a unha leira na rúa Azor.

Os axentes saltaron tamén ao interior da leira, relataron as mesmas fontes policiais, onde procederon á detención do novo, quen opuxo “grave resistencia”, subliñou a Policía Local. Tras o seu arresto, foi levado a dependencias policiais para instruír as dilixencias oportunas para o xulgado de garda.