A Deputación de Lugo adxudicou con 505.600 euros as obras para construír un carril bici no paseo do río Rato. O percorrido estenderase ao longo de dous quilómetros e medio, entre a zona da Tolda da Castela e o cruce da LU-530 coa LU-P-2925. Agárdase que os traballos se inicien logo do verán.
Así o informaron o voceiro do goberno en funcións, Álvaro Santos, e a alcaldesa de Lugo, Lara Méndez. Destacaron o cumprimento dun compromiso que tiñan cos veciños, que era o de “dinamizar o pulmón verde da cidade”. Para iso, na zona da Tolda, instalarase unha zona de ocio con bancos, paneis informativos, etc. Á beira do propio carril construirase, ademais, unha tarima de 2,5 metros de ancho e colocarase un pasamáns de seguridade por todo o tramo.
Debido ao nivel que existe en distintos puntos do paseo, tamén será necesario construír catro plataformas elevadas, sostidas ao chan por vigas de madeira. A maiores, dotarase a área dun aparcadoiro para bicicletas e sinalización. Dende a Deputación salientan que se empregarán materiais antiesvarantes e respectuosos co medio ambiente.
A fío disto, a rexedora local valorou o “impulso” por un “modelo de cidade máis humana, con máis mobilidade, accesibilidade, integración e con maior grao de recuperación de espazos públicos”.
