O Concello de Vilalba na súa aposta pola humanización do casco urbano segue a implementar actuacións e iniciativas destinadas a darlle prioridade ás persoas sobre os coches e mellorar a seguridade viaria.
A última acción está sendo a instalación de 16 novas sinais indicativas nos pasos de peóns como medida de seguridade. Son termoplásticas e antideslizantes que se puxeron en zonas escolares e que se porán tamén nas rúas Chao Ledo, Plácido Peña e Campo da Ponte.
O sistema devandito non é novo, pois xa o teñen empregado cidades europeas, e cumpren cos parámetros recomendados pola Dirección Xeral de Trafíco (DXT). Inclúen ademais pictogramas, facilitando a súa comprensión por parte dos nenos e das persoas con TEA.
“Son pequenos pasos na procura do noso obxectivo de ter un concello seguro e inclusivo, no que as persoas recuperen o seu protagonismo”, lembra Luis Fernández, concelleiro de Urbanismo.