A escritora Antía Yáñez recibe este sábado en Vilalba o Premio Agustín Fernández Paz

A súa obra 'Plan de rescate' foi a vencedora nestes premios de narrativa infantil e xuvenil pola igualdade. O acto está organizado por Edicións Xerais, o Concello de Vilalba e o Instituto de Estudos Chairegos.

A escritora burelá Antía Yáñez | AXM

A escritora burelá Antía Yáñez recibirá este sábado, 1 de febreiro, en Vilalba, o Premio Agustín Fernández Paz de narrativa infantil e xuvenil pola igualdade. O acto de entrega, previsto para as 20:30 horas no Auditorio Municipal de Vilalba, está organizado polo Instituto de Estudos Chairegos, o Concello de Vilalba e Edicións Xerais.

A obra ‘Plan de rescate’ valeulle a Antía Yáñez este recoñecemento na terceira convocatoria dos Premios Agustín Fernández Paz. Para entregarlle o premio, artellarase un acto cheo de música, poesía e teatro. Carmen Hermida será quen presente o evento, no que tamén intervirán a presidenta do Iescha, Marisa Barreiro; a alcaldesa de Vilalba, Elba Veleiro; o director de Xerais, Fran Alonso; e o membro do xurado Manuel Bragado.

“HUMOR E IRONÍA”

O tribunal destacara o “humor e ironía” de ‘Plan de rescate’, unha obra protagonizada por Noela, unha rapaza de dez anos en cadeira de rodas. A historia está ambientada na escola, onde varios compañeiros e compañeiras se verán inmersos nunha “inesperada operación de rescate”.

DEIXAR UN COMENTARIO

Please enter your comment!
Please enter your name here