O presidente da Deputación de Lugo, Darío Campos, e a alcaldesa de Guitiriz, Regina Polín, asinaron este venres un convenio de colaboración para a construción na Casa da Botica dunha residencia con capacidade para 52 maiores. O proxecto inclúe 26 habitacións individuais, con posibilidade de ser dobres. Nun comunicado, a propia Deputación explicou que o acordo contempla unha achega dun millón de euros por parte da ddministración provincial para a construción deste centro de atención a persoas maiores, mediante a rehabilitación de devandito edificio municipal.

Tal e como indicou Campos, o concello ten a obriga de pór a disposición os terreos, “algo que xa fixo”, así como de facer unha achega económica de 200.000 euros. A alcaldesa do municipio explicou que reduciu os gastos políticos da corporación municipal, de xeito que “xa aforrou esta cantidade adicada ao proxecto”.

Campos e Polín informaron de que o Concello de Guitiriz está a traballar na tramitación da licenza de obras, coa previsión de facela efectiva nas vindeiras semanas. Seguidamente, poderanse licitar os traballos por parte da Deputación, contando coa previsión de comezar en setembro, xa que “o obxectivo é poder pór en marcha estas actuacións antes de que remate o ano”.

RESIDENCIA NA CASA DA BOTICA E CENTRO DE DÍA

Así mesmo, a Deputación elaborou un novo proxecto, porque onde antes se ía a construír unha residencia e un centro de día, agora “exclusivamente” faise o asilo, xa que a alcaldesa habilitou e mellorou a Antiga Casa dos Peóns Camiñeiros, que é de titularidade municipal, ao “darlle un uso social”, porque nela se está construíndo o centro de día.

Deste xeito, segundo indicou a administración, púidose “ampliar o número de prazas de residencia” na Casa da Botica. Polo que respecta á Antiga Casa dos Peóns Camiñeiros, o concello xa acondicionou o exterior desta vivenda, que terá capacidade para 12 prazas en centro de día. Así, tal e como sinalou a Deputación, a localidade de Guitiriz disporá dunha residencia na Casa da Botica, con capacidade para 52 maiores, e un centro de día para outros 12 veciños, o que supón unha suma total de 64 prazas dispoñibles.

REITERADA NEGATIVA DO PP

Por outra banda, Campos Conde lembrou que “coa construción desta residencia, Deputación e Concello saldan unha débeda histórica cos veciños de Guitiriz, ofrecéndolles unha infraestrutura social na que os maiores do municipio, e tamén da comarca, poderán recibir atención profesional preto das súas casas”. Por iso, insistiu en que esta iniciativa se enmarca dentro da súa “aposta por ser unha Deputación coas persoas, sumamente social”. Así, o presidente avanzou que a previsión é licitar as obras da Casa da Botica no mes de setembro para poder inicialas neste mesmo ano.

“Trátase dun proxecto que sempre defendín desde que son alcaldesa”, lembrou Regina Polín, e incidiu en que, “nos pasados días, (a iniciativa) contou coa oposición do Partido Popular”. Respecto diso, apuntou que, “no último pleno municipal, os concelleiros do PP volveron votar en contra da construción desta residencia”. En concreto, a alcaldesa da localidade lucense considerou que se trata de “unha infraestrutura moi demandada”, xa que “a realidade é que hai ducias de veciños de Guitiriz que están en centros de Castro de Rei, O Incio, Quiroga ou Outeiro de Rei”, porque “no seu concello correspondente non contan con esta prestación”.

CARACTERÍSTICAS DO NOVO PROXECTO DE RESIDENCIA

O conxunto final da edificación da Casa da Botica constará de tres plantas e disporá de 26 habitacións individuais para uso normal, que poden converterse en habitacións dobres, e unha habitación, a maiores, para uso de enfermaría por residentes que necesiten unha atención sanitaria importante. A planta baixa do edificio existente reformarase para albergar a cociña e as zonas de servizo anexas, o comedor, o despacho de dirección, os aseos adaptados e unha sala de reunións, así como un distribuidor e unhas escaleiras que comunicarán esta planta coas superiores. Na zona de nova construción situarase o acceso principal á residencia, a recepción, o montacamas –que servirá tamén de ascensor–, un pequeno almacén de roupa, cinco dormitorios para residentes –con cuarto de baño adaptado a cada un deles–, así como os vestiarios e aseos do persoal. Nesta parte do edificio situarase outra escaleira que unirá esta planta coas altas.

A primeira planta albergará na zona do edificio existente unha sala multiusos, un local para fisioterapia, un ximnasio, un despacho médico, unha habitación de enfermaría con baño adaptado incorporado e dous aseos adaptados para o uso xeral. Na parte de nova construción haberá seis habitacións –cada unha delas cun baño adaptado incorporado– e un local para baño xeriátrico, ademais dunha pequena zona de estar. Finalmente, na segunda planta, na parte correspondente ao edificio existente, haberá nove habitacións –cada unha delas con baño adaptado incorporado–, mentres que a parte de nova construción albergará seis habitacións –tamén con baño adaptado en cada unha delas–, así como un pequeno local para almacén e útiles de limpeza.