Denuncian por “irregularidades contables” á comunidade de montes que preside o alcalde de Xermade

O comuneiro denunciante asegura que "non se está levando a cabo unha xestión responsable, rigorosa e leal".

Comunidade de montes de Lousada, en Xermade, que preside o alcalde desta localidade, Roberto García / Remitida

Un veciño e comuneiro, Alfonso Fernández Pena, presentou unha denuncia no Xulgado de Instrución de Vilalba contra a xunta directiva da Comunidade de Montes de Lousada, que preside Roberto García -o alcalde de Xermade-, por un suposto delito de “administración desleal” na xestión dos montes veciñais en man común desa parroquia xermadina.

A denuncia, que foi ratificada este xoves, deriva “das irregularidades detectadas na contabilidade da comunidade de montes nun auditoria externa encargada por un grupo de comuneiros”, segundo explica Alfonso Fernández.

Ese “informe pericial independente”, informou, detectou “un desfasamento de máis de 30.000 euros no balance contable do ano 2017”, entre “o saldo positivo que figura na contabilidade oficial presentada pola xunta directiva e o que realmente existe nas contas da comunidade”.

Ademais, engade, tamén detectou “movementos bancarios e cargos por importe de máis 10.000 euros sen soporte documental algún”. Segundo o denunciante, “non se está levando a cabo unha xestión responsable, rigorosa e leal“, polo que tomou a decisión de recorrer ao Xulgado “en defensa dos intereses da propia comunidade de montes” e para velar polos dereitos dos 70 comuneiros afectados.

Precisa que o suposto delito penal e as correspondentes penas asociadas “recaería sobre a totalidade da xunta directiva actual, presidida por Roberto García, e o restantes seis membros da xunta reitora, escollida na asemblea xeral extraordinaria que foi celebrada o 5 de maio de 2018”.

DEIXAR UN COMENTARIO

Please enter your comment!
Please enter your name here