Sete detidos dun grupo criminal por case un centenar de roubos en vivendas nas provincias de Pontevedra e Lugo

(Arquivo) Helicóptero EC-135 da Garda Civil | Andrew Thomas

A Garda Civil desmantelou un grupo criminal, coa detención de sete persoas, ao que se lle atribúe case un centenar de roubos en vivendas nas provincias de Pontevedra e Lugo.

Segundo avanzou o Instituto Armado, foi desarticulado “un importante grupo criminal organizado” asentado na provincia de Pontevedra, ao que se lle atribúe case un centenar de roubos en vivendas cometidos durante os últimos meses nas provincias de Lugo e, especialmente, na pontevedresa.

A operación, denominada ‘Espá’, concluíu co balance provisional de sete persoas detidas e a recuperación de “unha importante cantidade de efectos subtraídos”, indicou a Benemérita.

A subdelegada do Goberno na provincia, Maica Larriba, e o tenente coronel xefe interino da Comandancia da Garda Civil de Pontevedra, Manuel Touceda, informarán este mércores sobre os detalles da operación ás 10,30 horas no acuartelamento da Garda Civil de Lalín, onde estará exposto o material intervido.