Vandalismo en Lugo: danados sete vehículos e arrincadas tres papeleiras

Un mozo de 21 anos con antecedentes policiais foi detido por estes feitos que aconteceron na zona de Fontiñas.

(Arquivo) Unidade do Corpo Nacional de Policía | Contando Estrelas
(Arquivo) Unidade do Corpo Nacional de Policía | Contando Estrelas

Axentes da Policía Nacional detiveron na madrugada do mércores 13 de marzo a un mozo de 21 anos por un delito de danos contra o mobiliario público e contra a propiedade privada por danar sete vehículos e arrincar tres papeleiras das súas ancoraxes nunha avenida da cidade de Lugo.

Segundo informou a Policía Nacional, “este vándalo foi sorprendido sobre as 2,50 horas” deste mércores cando un equipo de radio patrullas realizaba labores de vixilancia pola zona da Avenida das Fontiñas. “Neses momentos arrastraba un ciclomotor”, engaden as mesmas fontes, que precisan que, posteriormente, “comprobouse que non era seu”.

Ante a presenza policial o mozo empezou a correr, pero foi interceptado a escasos metros do lugar. Un veciño que viu a actuación policial alertou de que ese mesmo mozo estivera danando coches ao longo da Ronda de Fontiñas.

Na comprobación do lugar detectáronse polo menos sete vehículos danados, algúns cos espellos retrovisores rotos, outros con aboladuras nas portas provocadas por patadas, así como tres papeleiras arrincadas das súas suxeicións.

No traslado á comisaría o mozo ameazou e gritou insultos tanto cara aos policías como cara ao órgano xudicial, resaltou a Policía Nacional. O mozo, que conta con antecedentes penais, foi posto a disposición xudicial este mércores. Neste operativo interveu o Equipo de Radio Patrullas e o Grupo Operativo de Resposta da Brigada Provincial de Seguridade Cidadá.