Axentes da Policía Local de Lugo interceptaron a un condutor que carece de carné por perder todos os puntos que triplicou a taxa máxima de alcoholemia permitida.
Segundo informou a Policía Local, o fin de semana pasado foi sorprendido o condutor dun vehículo na Avenida da Coruña que carece de permiso de condución pola perda de puntos e obtivo positivo nas probas de detección alcohólica de 0,77 mg/l.
Por iso, concretaron as mesmas fontes policiais, instruíronse dilixencias por dous delitos contra a seguridade viaria e o turismo que conducía esta persoa foi inmobilizado.
Por outra banda, na rúa das Artes, fronte á Xefatura da Policía Local, detectouse a condución irregular dun turismo, cuxo condutor tiña, indica a Policía Local, “signos de embriaguez”.
Os axentes comprobaron que este condutor carece de permiso de condución pola perda dos puntos asignados. O individuo, ademais, negouse a someterse ás probas de detección alcohólica.
Por iso, instruíronse dilixencias por dous delitos e será citado na modalidade de xuízo rápido, mentres que o vehículo que conducía quedou inmobilizado.
Ademais, durante o pasado fin de semana a Policía Local sorprendeu ao condutor dun turismo na rúa Santo Graal cunha taxa de alcol de 0,46 mg/l, debido ao que lle abriron expediente sancionador con multa de 500 euros e a retirada de catro puntos do carné.
Polo seu lado, na Rúa do Concello foi detido un vehículo por condución “irregular”, sinalan as mesmas fontes, polo que o seu condutor foi sometido ás probas de detección alcohólica nas que obtivo positivo de 0,40 mg/l. Debido a iso abríuselle expediente sancionador con multa de 500 euros e a retirada de catro puntos do permiso.
Tamén no marco dos controis do fin de semana pasado, realizóuselle o test de drogas a un condutor que obtivo positivo en THC, BZO e AMP, polo que se lle abriu un expediente sancionador con multa de mil euros e a retirada de seis puntos do carné.
XUÍZO RÁPIDO
Así mesmo, na Avenida da Coruña en Lugo foi sorprendido o condutor dun vehículo que circulaba “irregularmente”, destaca a Policía Local, e cuxo condutor presentaba “signos de embriaguez”.
Por iso, foi sometido ás probas de detección alcohólica, nas que obtivo positivo de 0,72 mg/l, polo que se instruíron dilixencias por un delito contra a seguridade viaria na modalidade de xuízo rápido. Neste caso, o vehículo que conducía este individuo foi trasladado ao depósito municipal, onde quedou inmobilizado.
Finalmente, tamén o fin de semana pasado un vehículo foi detectado na rúa Bernardo Pardo cuxo condutor estaba baixo efectos de bebidas alcohólicas, sosteñen as mesmas fontes policiais, e obtivo positivo de 0,65 mg/l. Neste caso instruíronse dilixencias por delito contra a seguridade viaria na modalidade de xuízo rápido e o vehículo foi inmobilizado.