A familia dos dous asasinados a tiros no crime do Ceao, que segue sen esclarecerse 27 anos despois, volverán render unha homenaxe ás vítimas o 30 de abril, con motivo do aniversario do dobre crime.

Foi o 30 de abril de 1994 cando se acharon os corpos de Esteban Carballedo, que era repoñedor na nave do Cash Record no polígono industrial de Lugo, e Elena López, caixeira en dito negocio. A irmá desta última, Isabel, foi quen achou os cadáveres de ambos, que presentaban varios tiros con arma de fogo.

Isabel López comentou que a homenaxe vai ter que realizarse “a través das redes”, e non “presencialmente” como fixeron nos últimos anos, tamén a modo de protesta pola “errada” investigación que levou a Policía Nacional e que “deixou moitos cabos soltos”, explicou. “Queremos divulgar que a investigación está como está, a ver se se move un pouco máis”.

AVANCES NA INVESTIGACIÓN

Agora a Audiencia Provincial de Lugo leva a instrución e o “último” que saben as familias é que “o fiscal autorizou todas as dilixencias” que pedía o avogado e que pasaban pola toma de declaracións a distintas testemuñas, indicou.

“Unha das persoas que ía declarar, que pensabamos que era unha peza importante no proceso, faleceu. Vánsenos caendo as pistas, pero nós seguiremos a ver o que se decide”, lamentou a irmá da falecida.

As familias do dobre crime seguen considerando como autor a un hostaleiro do centro de Lugo, que sería confidente da Policía Nacional, e que agora reside en Burgos. Isabel López quéixase porque segue “sen entender” que non se lle tome declaración ao “principal” sospeitoso. “Un dos cabos é ese e non sabemos porque non tiran del. Imos seguir presionando a ver se dalgunha maneira pode tomárselle declaración”, esgrimiu.

A pandemia paralizou esta investigación, que comezou nun xulgado de Primeira Instancia e ante a ausencia de avances finalmente foi a Audiencia Provincial de Lugo a que asumiu o caso.