Axentes da Policía Nacional adscritos á Comisaría Provincial de Lugo, encargados da investigación dos delitos realizados a través das redes informáticas, detiveron de novo por estafa a unha muller, nacida en Carballo pero con domicilio na capital luguesa, por cobrar dúas veces artigos en liña co engano de que non recibira a transferencia.
Segundo informou a Policía Nacional, á autora impútanselle nesta ocasión dous delitos de estafa, por un valor superior a 2.000 euros, e que foron cometidos tras ofrecer “diferentes artigos electrónicos en varios portais de venda en liña”.
O modus operandi, en ambas as ocasións, destacou a Policía, consistía en “ofrecer un artigo a un bo prezo” e o comprador ponse en contacto coa persoa que o vende na páxina correspondente.
“Nesta primeira conversación realizan os trámites coma se fose un home, e derivan ao comprador a seguir co negocio a través de whatsapp, nun momento dado, o home di que se ten que ir traballar, e que continua coa transacción a súa moza”, relata a Policía.
“De novo e por whatsapp, seguen establecendo as condicións de venda, enviando incluso unha fotografía do artigo, ou o seu envoltorio, xunto á vendedora, tamén foto do Documento Nacional de Identidade”, engaden as mesmas fontes policiais.
Unha vez pechado o prezo, a estafadora pídelle o ingreso nunha conta bancaria, e indícalle que o envío se realizará a través dunha empresa de mensaxería.
COBRABA O DOBRE
Despois a estafadora ponse en contacto co cliente, a quen lle recrimina que non recibiu a transferencia, cando esta si está feita, e pídelle que o faga cunha plataforma virtual. Desta maneira recibe o dobre de diñeiro do que se trataba a venda.
Como o comprador non obtén a mercadoría, ponse en contacto coa estafadora a cal lle indica o nome da empresa de mensaxería, coa que se pon en contacto o comprador e xa aquí lle indican que o estafaron, ao ser esta muller xa coñecida.
Desta forma ponse o caso en coñecemento da Policía Nacional, un dos casos de Valencia e o outro de Cartaxena. Iso levou á detención desta muller. Do actuado foi informado o xulgado correspondente. A arrestada, que coa detención actual suma seis estafas, sinalou a Policía Nacional, quedou en liberdade á espera de xuízo.