A Garda Civil detivo un veciño de Baralla de 45 anos de idade como presunto autor dos delitos de tentativa de furto e usurpación de identidade tras facerse pasar por inspector de Facenda para roubar na vivenda de dúas persoas de idade avanzada.
Segundo informou o Instituto Armado, os feitos tiveron lugar o pasado mes de outubro no termo municipal de Portomarín cando a persoa detida supostamente finxiu ser inspector de Facenda para acceder a un domicilio onde residen dúas persoas maiores. Alí rexistrou varias estancias sen autorización dos seus moradores.
A persoa detida en relación con estes feitos foi posta a disposición xudicial.