A Policía Local de Lugo interceptou na noite do sábado tres condutores que protagonizaron unha persecución polo centro da cidade. Os axentes procederon a denunciar os implicados por incumprir o toque de queda, xa que pasaban das 23,00 da noite, e a dous deles, ademais, por conducir baixo os efectos de alcol e drogas.
Os feitos sucederon sobre as 23,05 horas, cando se recibiu na sala do 092 unha chamada na que un condutor informaba de que estaba a ser perseguido por outro vehículo co que tivera un accidente de circulación na glorieta que conecta a Avenida Duquesa de Lugo coa rúa Paradai.
Ademais, durante o percorrido polo centro da cidade, a esta persecución uniuse un segundo coche despois de que o seu amigo o avisase por teléfono móbil. O traxecto finalizou na rúa das Artes, nas inmediacións da Policía Local, onde se produciu un intento de agresión que foi cortada polos axentes.
Así, os actuantes procederon a someter aos tres condutores implicados ás probas de detección de alcol e drogas. Deste xeito, tanto o perseguido como un dos perseguidores deron positivo en cocaína e cannabis. Este último tamén arroxou unha taxa de alcoholemia de 0,53. Estes resultados tiveron como consecuencia a apertura de dilixencias policiais por infraccións que poden supor multas de 1.000 euros e a perda de seis puntos do permiso de conducir.
Así mesmo, de acordo coa normativa sanitaria para facer fronte á pandemia do coronavirus, foron denunciados por circular pola vía pública pasadas as 23,00 horas, cando estaba vixente o toque de queda.