A Policía Local de Lugo denunciou o responsable dun bar de Lugo por ter o local aberto e incumprir así as restricións impostas pola Xunta, segundo as cales se decretou o peche temporal do sector hostaleiro durante alomenos un mes.
Segundo informou a Policía Local, este mércores, 11 de novembro, efectivos da Unidade Territorial de Policía de Barrio realizaron controis para comprobar o cumprimento das normas e restricións. Foi así cando se comprobou que un local da rúa Pintor Villamil / Yáñez Rebolo se atopaba aberto e con catro clientes no seu interior.
Por unha banda foi denunciado o responsable do local hostaleiro e, pola outra, os axentes tamén tramitaron denuncia a un dos clientes por non levar posta a máscara.
MOBILIDADE
Ademais, a Policía tamén identificou a cinco persoas que intentaban entrar sen xustificación dentro da cidade, onde aínda se mantén o peche perimetral. Segundo puntualizaron fontes policiais, os denunciados procedían de Navarra, Ribadeo, Begonte (dúas persoas) e Muxía.